Gratien de Beaurepaire

Charles, par la grâce de Dieu, roy de France, a tous ceulx qui ces présentes lettres verront, salut. Sçavoir faisons que Gatien Gaultier, escuier, seigneur de Jort et de Pierreficte, fils de feu Jehan Gaultier, en son vivant escuier, et de damoiselle Jacqueline de Beaurepaire, sa femme, et Jehan de Beaurepaire, cousin germain dudict Gaultier, natifz et demourans en nostre viscomté d'Argenthen et Exmes, duché d'Alençon. Nous ont très humblement faict supplier, d'aultant que ledict cognon de Beaurepaire est en danger de briefvement périr et demourer estainct, à cause que ledict Jehan de Beaurepaire, qui est desja aagé, n'aiant oppinion de soy marier, est seul du nom, qu'il nous plaise, en faveur et considération que ledict Gaultier est le plus proche parent dudict de Beaurepaire, pour continuer ledict cognon en mémoire de... pour accorder que icelluy Gaultier et ses successeurs descenduz de luy en loial mariage prènent et portent à tousjours ledict cognon de Beaurepaire, ce qu'ilz ne pourraient faire sans leur estre sur ce par nous pourveu par noz lettres à ce convenables, lesquelles ils nous ont très humblement supplié de leur accorder : Nous, à ces causes, désirant continuer la mémoire des maisons antiennes de nostre roiaulme, avons permis, octroié et accordé audict Gaultier prendre pour luy et ses successeurs de luy descenduz en loial mariage, ledict cognon de Beaurepaire, sans qu'il soit plus tenu se nommer Gaultier. Si donnons en mandement à noz juges et officiers en ladicte vicomté d'Argenthen et Exmes, que s'il leur de ce qui dict est, ilz souffrent ledict Gaultier prendre et retenir pour luy et ses successeurs, comme dict est, ledict cognon de Beaurepaire, et facent noz présentes lettres lire, publier et proclamer ès auditoires de ladicte vicomté, à ce que personne n'en puisse prétendre cause d'ignorance ; car ainsy nous plaist-il estre faict, sans préjudice de noz droictz et d'aultruy. Donné à Saint-Germain-en-Laye, le XXVe jour de janvier l'an de grâce mil cin cens soixante ung et de nostre reigne le deuxième.
Sur le repli : Par le roy en son conseil.