Jacques Albert de Lattre

PHILIPPE II, etc. De la part de nostre bien amé Jacques de Latre, sieur de Willerval et Rollencourt, nous a esté très humblement remontré comme il seroit issu de bon et honorable parentage et que ses père et grand-père, bisayeul et aultres prédécesseurs oriundes de la Loewe (originaires de l'Allœu) en notre pays et comté d'Artois et lieux circonvoisins auroient toujours vescu en toute bonne réputation et plusieurs bonnes et nobles alliances mesmement les plus vieux et jouissoient aussy de beaux fiefz et honeste patrimoine, si auroient ilz de toute ancienneté et passez plus de cent et cinquante ans, se sentans descenduz de noble géné-ration, porté armoiries décentes et convenables à noblesse, telles que le dit suppliant les porte encores à présent sauf que lui n'y ses dits prédécesseurs se soient oncques entremis ou ayant exercé aucun stil ou art mechanicq, mais au contraire auroit le dit suppliant à divers fois été dénommé par les gouverneurs de nostre ville d'Arrast et autrement, eschevin d'icelle, en quoi il se seroit si bien et droitement conduict, même au commencement des troubles à vouloir réprimer la liberté populaire qui en contemple de ses bons offices et de l'affection quil avoit fait paroistre porter à la religion catholique appostolicque Romaine et nostre obeyssance, il auroit par tumulte populaire esté constitué prisonnier avecq aultres honorables personnaiges et les choses reduicies et luy de nouveau appellé au dit magistrat, auroit pour son intégrité et zèle a nostre dit service esté délégué de la part des estatz et villes de nostre dit comté d'Artois à la réception de nostre dit très chier et très amé bon neveu, chevalier de nostre ordre, le ducq de Parme et de Plaisance au gouvernement de nos pays d'embas, et employé en plusieurs autres charges et commissions d'emport, en quoi il se seroit toujours duement acquité, et com - bien pour les raisons susdites il se povait dire et maintenir noble et être tenu et reputé pour tel, néantmoins pour éviter la difficulté de preuve causée par les guerres advenues en nostre dit comté d'Artois après la mort du ducq Charles de Bourgogne nostre bisayeul que Dieu pardoingt, pour lesquelles auroient les prédécesseurs du dit suppliant abandonné leur ancienne résidence et aliéné leur patrimoine illecq par où leur mémoire y estoit à présent estaincte; a ceste cause se retiroit devers nous le dit Jacques de Latre en nous suppliant très humblement qu'en considération de ses bons et fidèles services et ceulx quil espère encoires faire à l'advenir et prins esgard aux indignités et afflixions quil avoit souffert pour ce que dict est, il nous pleut pour animer sa postérité à s'employer de bien en mieulx à nostre dit service ratifier icelles sa noblesse le tenir pour noble et descendu de noble génération et en tant que mestier seroit de nouveau annoblir luy ses enffants et ceux de ses enflans et postérité, les honorant des armes que jusques oires il a porté et de tout ce lui accorder noz lettres patentes en tel cas pertinentes. Scavoir faisons que nous, les choses susdites considérées et pour le bon temoignaige que par rescription du XX de janvier de l'an 1588 passé a donné nostre dit bon nepveu le ducq de Parme, le sieur de Marles nostre gouverneur dudit Arras des qualitéz aliances, ser-vices, debvoir et bons et competens moyens qu'a ledit Jacques de Latre pour maintenir la qualité de nobiesse avons pour nous noz hoirs et successeurs au dit Jacques de Latre ses enfans et ceux de ses enfans masles et femelles naiz et à naistre de léal mariage et leur postérité annobly et annoblissons à tousjours etc.

Les armoiries sont ainsi décrites: « Champ d'or a deux escussons d'azur au canton de gueulle chargé d'une moulette d'or. »

Donné en nostre ville de Madrid royaulme de Castille le

VIe jour de janvier l'an de grace XVe huietante neuf.